Gallery

يعني انتو عرب؟


تخيلو معي المشهد التالي :

ثلاث لبنانيي وواحد فرنساوي واقفين عام يشربو قهوة بعد الغدا في ما يعتبر من عادات الفرنسويي بي حيالله شركة بتحترم حالها بي فرنسا. اللبنانيي ثلاث شباب والفرنساوي زميل بالشغل من عمر اهلنا وزلمي فهمان ومطلع. حاصلو الحديث عن لبنان وعن الوضع السياسي العام في المنطقة. الحديث سلس والزلمي فهمان الوضع. المهم منوصل لامحل بالحديث بقول الزلمي “إيه ما انتو عرب” وهون بتحس الشباب تلعثمو، كل واحد كشر وجو بي طريقة وبلشت النظريات.

بالمبدأ كان في نظريتين. أول نظرية بتقول بي كل عنفوان “لأ نحن مش عرب، نحن لبنانيي” (ع فكرة هيدي ال لأ غير ال لأ تبع ١٣…هيدي جايي بلا يافطات عل طريق) وأكيد صاحب هل نظريه بقول “نحن فينيقيي وما خصنا بالعرب ونحن غير” وأكيد بلا ما يقول قصدو كمان إنو نحن منفتحين أكتر ومنلبس ومنكل ومنعيش بيطريقة عاملتنا حالة خاصة وهيك من كون مش عرب. يعني ما في إلا اللغة بتجمعنا وأنا قلك أصلاً شو منفهم عليهن وهل دستور إلي خبرنا إنو نحن عرب هيك فجأة من بعد ما كنا ذوي وجه عربي (ع فكرة شو يعني ذو وجه عربي ؟) (كمان على فكرة مش من زمان قضيت شي ساعة عام جرب اقنع شخص إنو الدستور حالياً بقول إنو لبنان بلد عربي وإنو هيدك كانت من زمان …بنتف حالي ؟ وبدن يحكو بالسياسة كمان ) وما ننسى كمان إنو هل نظرية بتجر وراها كل شي في محاولات تمايز طائفية وعرقية وما إلى هناك . هل نظرية كمان في منها بيجي أكتر علمي وبتقول إنو نحن مش فينيقيي وأصل البعض منا هو من شبه الجزيرة بس بردو نحن غير …


ثاني نظرية بتقول إنو يا خيي مبلا أكيد نحن عرب …عنا ذات اللغة ، وأصولنا كتير متداخلي بيبعضها وعنا كتير قيم مشتركة ومن شكل سوى هل شرق و عنا شعور بال إنتماء لهل عالم هيدا. أكيد كل بلد منو متل الثاني بس لاي أصلاً من قال إنو ألمانيا متل فرنسا أو متل رومانيا أو إيطاليا؟ صحيح نحن قراب من الغرب بيطريقة عيشنا بس قراب من الشرق بيقيمنا ولغتنا وبعدنا الثقافي وكمان قراب بياشيا مش منيحة متل إنو ما منقرا ومنحب كترت الحكي والشعر وكتير اشيا هيك … يعني مختصر نحن صلة وصل (هاي من كتاب الجغرافيا بالسزيام). بس السؤال المهم  هون يا حضرت الفرنساوي أو يا حضرت من ما كان أجنبي …إنت شو قصدك بي “انتو عرب” ؟ إيه نحن عرب بس حضرتك منك عارف شو يعني عرب.


خلينا نفكر بمنطق …هيدا لي قال نحن مش عرب … لاي قال هيك ؟ لأنو بيعرف شو يعني الواحد يكون عربي بالنسبة لا واحد أجنبي (هون عام بحكي عن أجنبي بشكل عام مش عن الزلمي إلي كان معنا لأنو هيداك فهمان) ما عبالي فسر شو يعني عرب بعيون واحد فرنساوي مثلاً لأنو بصير بدي إنقل حكي ما كتير بحبو، حكي طائفي وعرقي وتعميم من دون مبرر على ٤٠٠ مليون انسان . يعني من وجهة نظر معينة، هيدا اللبناني لي عام بقول أنا من عربي في يكون محق بلي عام بيقولو.


من ميلة تانية، هات لا نسأل لاي الأجنبي تحديداً بفرنسا عندو نظرة مش منيحة لل عرب. أول شي الإنسان العادي عموماً هو إنسان متلقي وما عندو الحشرية يروح يشوف بعينو أو يفتش عن الخبر الصحيح. بالتالي شو ما بيسمع بوسائل الإعلام الغربية بي صدق يعني مثلاً إنو العرب ارهابيي  أو إنو عرب = مسلمين  أو إنو عرب = تخلف أو كتير من هل أصص.   طيب مثلاً الفرنسي شو بيشوف مثال العرب قدامو؟ بيشوف عموماً مهاجرين عرب بيطريقة غير شرعية أو انتهازيين عام يستفيدو من تقديمات الدولة الفرنسية. طبعاً هودي الناس هني أقلية لاكن عام يعطوا صورة بشعة لا يطبق المثل إنو “بيروح الصالح بيضهر الطالح” . طيب شو يعني ؟ كمان هيدا الفرنساوي معو حق ؟ شو هل قصة هيدي راح يطلع كل واحد معو حق متل بيلبنان “ديمقراطية توافقية “.


طيب هيدا لي عم بقول مبلا نحن عرب بس انتو ما بتعرف شو يعني عرب. لاي عم بقول هيك ؟ أولاً هيدا حدا أكيد حاسس بالإنتماء العربي (مش بالضرورة يكون عايشها كتير بس إنو مقتنع بي هويتو) . ثانياً هيدا الشخص قال إنو أنا لاي بدي انكر أصلي بس كمان منو موافق على تعريف العرب عند الاجانب، طب لاي ما بجرب يشرحلن شو يعني عرب؟ يا خيي أي نحن عرب، منحكي عربي، أصل أغلبية اللبنانيي عربي ومجتماعتنا فايتي بيبعضها وتقاليدنا شرقيه وعنا كرم العرب وكتير اشيا ثانية.   هو بيعتقد إنو بي هل زمن الرديء مطرح ما بطل في خبر يوصل متل ما هوي ومطرح ما العالم صار كلو تابع لا وسائل إعلام مسيرة لازم اللبناني يكون شاهد لل حق ويحكي بي اصلو بلا ما يخاف من الصورة يلي راح ياخذها عنو واحد أجنبي … لأنو صورة الانسان هي بلي بيعملو وبي تصرفاته.

شو يعني هلق؟ هيدا الشخص معو حق كمان ؟ شو القصة ؟ شو قولكن ؟ ما معقول يكونو كلن معن حق.

شو قولكن ؟ عبالي شوف رأيكن …

Advertisements

9 responses to “يعني انتو عرب؟

  1. allah ykoon b3awynah 3allah 7alitnah .. that’s all i can say.
    we try to prove we’re different by pretending we have a democracy, but even that we don’t grant ourselves.

  2. Une conversation typique en France:
    -“Vous venez d’où”?
    -“Du Liban”
    -“Ah, la Libye!!!”
    -“Non Mr./Mme. du Libaaaan!”
    -“Du Liban et vous vous appelez Georges?!!!!”
    -“Pourquoi pas!?”
    -“Mais vous êtes musulan!”

    -“Vous avez des micro-ondes?? vous avez du vin?? vous avez du Mcdo?? vous avez, vous avez….???”
    Et le pire:
    -“C’est dure la vie dans le désert?”

  3. i agree 3adatan bass ta7adane y2oul menneh 3arabeh b7esso mastoul la2anno 3arabeh jeyeh men 2l lou8a yalli mne7kiya w yalli hiyeh al 3arabiya bass kamen fi ness btetshata3 bet2ellak la2 ne7na mne7keh lebneni w hayda l jaweb la7alo balweh
    bel mou5tasar ma3ak 7a2 el lebneni 3arabi bass hal l definitinion yalli ne7na 3enna yeha lal 3arabi hiyyeh zeta yalli aseda l ajnabeh ? ana 3adatane b2oul eh blebnen mne7keh 3arabeh fa izane ne7na 3arab … a7san ma da7ek l 3alam 3layyeh w 2oul 2enni pheni2eh la2anno hayda habal …

    • I’m not sure eno it’s only related to the language aw enno fi ma3na teineh la kelmit 3arabeh … ma3na entime2eh qawmi etni dini … be3te2id enno 3adam woudou7 hal te3bir hayda byekhlo2 ktir men l daya3

  4. المتشائل

    ana bechhad eni 3echet haydoul elmawakef w elcommentet w ba3ed 3indi chi senten hone fa el5ayr la edem … w eh ne7na 3arabi …

  5. المتشائل

    w don’t forget the camels lamen 🙂

  6. hey guys, this conversation is very interesting between lebanese people, especially the immigrants, it’s ok to have different point of view, the important is to keep talking about the difference not to hide them.

  7. aya 3adim el ma3rife baddo yije yde3e inno el libnene 3arabe!?
    btinso inno el libnene 3indo minimum 2500 sinet teri5 abel el 3arab!?

    w ba3den la hal masi7iyye yalle bi 2ulo innon 3arab: el injil ma ttarjam 3al 3arabe illa ba3ed awe5er el arn el 19!
    nese inno jdudak 3eno 1200 sinet aher w 3azeb men wara el 3arab wel duwal el islemiyye!? nese inno el masi7e harab men muduno w t5abba bi jabal libnen ta yiltije men hal 3arab el barbar!!? nese 3an kif ijo el 3arab w 7ara2o mudunna, haddaduna bel 2atel, w 8tasabo banet el se7el bi ism nasher el din el isleme!?

    el awmiyye el 3arabiyye n7attet ka muwa77ed lal manta2a ta yjarrbo y2arrbo el 3ale2a bayn el tawa2ef…

    jib wa7ad libnene maroune w 7otto 7add el s3ude lesh fi no2tet shabah!?!?

    hayde osas 3amb bi jarrbo yim7uwa men teri5 el mwarne w se2er el masi7iyye w el islem el libneniyye! mesh ya3ne iza le8yuwa men kotob el teri5 ya3ne nassuna 3azeb ajdedna!

    3ayb 3laykon jami3an yalle bit neshdo bi 2awmiyye 3arabiyye w into ma bta3erfo 7aref men teri5 el sha3eb el libnene el asle!

    el libnene fini2e/canaane ma tittiklo 3ala diraset mzawwara ta t2illkon shu aselkon! ttalla3o bi nafeskon lesh into fi shi byorbotkon bel s3ude ma 3ada el lo88a!?

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s