يعني انتو عرب؟

تخيلو معي المشهد التالي :

ثلاث لبنانيي وواحد فرنساوي واقفين عام يشربو قهوة بعد الغدا في ما يعتبر من عادات الفرنسويي بي حيالله شركة بتحترم حالها بي فرنسا. اللبنانيي ثلاث شباب والفرنساوي زميل بالشغل من عمر اهلنا وزلمي فهمان ومطلع. حاصلو الحديث عن لبنان وعن الوضع السياسي العام في المنطقة. الحديث سلس والزلمي فهمان الوضع. المهم منوصل لامحل بالحديث بقول الزلمي “إيه ما انتو عرب” وهون بتحس الشباب تلعثمو، كل واحد كشر وجو بي طريقة وبلشت النظريات.

بالمبدأ كان في نظريتين. أول نظرية بتقول بي كل عنفوان “لأ نحن مش عرب، نحن لبنانيي” (ع فكرة هيدي ال لأ غير ال لأ تبع ١٣…هيدي جايي بلا يافطات عل طريق) وأكيد صاحب هل نظريه بقول “نحن فينيقيي وما خصنا بالعرب ونحن غير” وأكيد بلا ما يقول قصدو كمان إنو نحن منفتحين أكتر ومنلبس ومنكل ومنعيش بيطريقة عاملتنا حالة خاصة وهيك من كون مش عرب. يعني ما في إلا اللغة بتجمعنا وأنا قلك أصلاً شو منفهم عليهن وهل دستور إلي خبرنا إنو نحن عرب هيك فجأة من بعد ما كنا ذوي وجه عربي (ع فكرة شو يعني ذو وجه عربي ؟) (كمان على فكرة مش من زمان قضيت شي ساعة عام جرب اقنع شخص إنو الدستور حالياً بقول إنو لبنان بلد عربي وإنو هيدك كانت من زمان …بنتف حالي ؟ وبدن يحكو بالسياسة كمان ) وما ننسى كمان إنو هل نظرية بتجر وراها كل شي في محاولات تمايز طائفية وعرقية وما إلى هناك . هل نظرية كمان في منها بيجي أكتر علمي وبتقول إنو نحن مش فينيقيي وأصل البعض منا هو من شبه الجزيرة بس بردو نحن غير …

ثاني نظرية بتقول إنو يا خيي مبلا أكيد نحن عرب …عنا ذات اللغة ، وأصولنا كتير متداخلي بيبعضها وعنا كتير قيم مشتركة ومن شكل سوى هل شرق و عنا شعور بال إنتماء لهل عالم هيدا. أكيد كل بلد منو متل الثاني بس لاي أصلاً من قال إنو ألمانيا متل فرنسا أو متل رومانيا أو إيطاليا؟ صحيح نحن قراب من الغرب بيطريقة عيشنا بس قراب من الشرق بيقيمنا ولغتنا وبعدنا الثقافي وكمان قراب بياشيا مش منيحة متل إنو ما منقرا ومنحب كترت الحكي والشعر وكتير اشيا هيك … يعني مختصر نحن صلة وصل (هاي من كتاب الجغرافيا بالسزيام). بس السؤال المهم  هون يا حضرت الفرنساوي أو يا حضرت من ما كان أجنبي …إنت شو قصدك بي “انتو عرب” ؟ إيه نحن عرب بس حضرتك منك عارف شو يعني عرب.

خلينا نفكر بمنطق …هيدا لي قال نحن مش عرب … لاي قال هيك ؟ لأنو بيعرف شو يعني الواحد يكون عربي بالنسبة لا واحد أجنبي (هون عام بحكي عن أجنبي بشكل عام مش عن الزلمي إلي كان معنا لأنو هيداك فهمان) ما عبالي فسر شو يعني عرب بعيون واحد فرنساوي مثلاً لأنو بصير بدي إنقل حكي ما كتير بحبو، حكي طائفي وعرقي وتعميم من دون مبرر على ٤٠٠ مليون انسان . يعني من وجهة نظر معينة، هيدا اللبناني لي عام بقول أنا من عربي في يكون محق بلي عام بيقولو.

من ميلة تانية، هات لا نسأل لاي الأجنبي تحديداً بفرنسا عندو نظرة مش منيحة لل عرب. أول شي الإنسان العادي عموماً هو إنسان متلقي وما عندو الحشرية يروح يشوف بعينو أو يفتش عن الخبر الصحيح. بالتالي شو ما بيسمع بوسائل الإعلام الغربية بي صدق يعني مثلاً إنو العرب ارهابيي  أو إنو عرب = مسلمين  أو إنو عرب = تخلف أو كتير من هل أصص.   طيب مثلاً الفرنسي شو بيشوف مثال العرب قدامو؟ بيشوف عموماً مهاجرين عرب بيطريقة غير شرعية أو انتهازيين عام يستفيدو من تقديمات الدولة الفرنسية. طبعاً هودي الناس هني أقلية لاكن عام يعطوا صورة بشعة لا يطبق المثل إنو “بيروح الصالح بيضهر الطالح” . طيب شو يعني ؟ كمان هيدا الفرنساوي معو حق ؟ شو هل قصة هيدي راح يطلع كل واحد معو حق متل بيلبنان “ديمقراطية توافقية “.

طيب هيدا لي عم بقول مبلا نحن عرب بس انتو ما بتعرف شو يعني عرب. لاي عم بقول هيك ؟ أولاً هيدا حدا أكيد حاسس بالإنتماء العربي (مش بالضرورة يكون عايشها كتير بس إنو مقتنع بي هويتو) . ثانياً هيدا الشخص قال إنو أنا لاي بدي انكر أصلي بس كمان منو موافق على تعريف العرب عند الاجانب، طب لاي ما بجرب يشرحلن شو يعني عرب؟ يا خيي أي نحن عرب، منحكي عربي، أصل أغلبية اللبنانيي عربي ومجتماعتنا فايتي بيبعضها وتقاليدنا شرقيه وعنا كرم العرب وكتير اشيا ثانية.   هو بيعتقد إنو بي هل زمن الرديء مطرح ما بطل في خبر يوصل متل ما هوي ومطرح ما العالم صار كلو تابع لا وسائل إعلام مسيرة لازم اللبناني يكون شاهد لل حق ويحكي بي اصلو بلا ما يخاف من الصورة يلي راح ياخذها عنو واحد أجنبي … لأنو صورة الانسان هي بلي بيعملو وبي تصرفاته.

شو يعني هلق؟ هيدا الشخص معو حق كمان ؟ شو القصة ؟ شو قولكن ؟ ما معقول يكونو كلن معن حق.

شو قولكن ؟ عبالي شوف رأيكن …